। अहमदनगर । दि.11 फेब्रुवारी । एकाच फ्लॅटची दोघांना विक्री करीत 15 लाख रुपयांच्या फसवणुकीची घटना उघडकीस आली आहे. याप्रकरणी एकाजणाविरूद्ध तोफखाना पोलीस ठाण्यात फसवणुकीचा गुन्हा दाखल झाला आहे. रामहरी मारुती शिरोळे (रा. गुलमोहर रोड, पोलीस चौकी मागे) असे गुन्हा दाखल झालेल्या आरोपीचे नाव आहे.
नगर शहरातील औरंगाबाद रोडवरील अभियंता कॉलनीत राहणार्या राणी तिम्मराज यांनी याबाबत फिर्याद दिली आहे. रामहरी शिरोळे याच्याकडून फिर्यादी यांनी फ्लॅट खरेदी केला होता. त्यासाठी त्यांनी नगरमधील एका बँकेत सोनेतारण कर्ज काढत 10 लाख रुपये रोख शिरोळे यास दिले होते. त्यानंतर सात-बारा उतार्यावर नावाची नोंदणी झाल्यावर पाच लाख रुपये देण्याचे ठरले होते.
तसेच नोटरी व साठेखत शिरोळे याने फिर्यादी महिलेस करुन दिले होते. त्यानंतर खरेदीखत करण्यासाठी शिरोळे याच्याकडे वारंवार पाठपुरावा करुनही त्याने खरेदीखत करून देण्यास टाळाटाळ केली. त्यानंतर फिर्यादी यांनी या जागेवर जावून पाहणी केली असता फ्लॅट पूर्णपणे जमीनदोस्त करण्यात आलेला त्यांच्या निदर्शनास आला.
त्यानंतर त्यांनी सावेडीच्या तलाठी कार्यालयात जावून या जागेबाबत चौकशी केली असता संबंधित फ्लॅट हा शिरोळे याने यापूर्वीच 3 एप्रिल 2019 रोजी सुभाष विश्वास बाबर नावाच्या व्यक्तीला विकला असल्याचे त्यांच्या निदर्शनास आले.
हा फ्लॅट अगोदरच विकलेला असताना तो दुसर्यांदा विक्री करण्याच्या उद्देशाने नोटरी व साठेखत करुन आपली 15 लाख रुपयांची फसवणूक केल्याचे त्यांनी या फिर्यादीत म्हटले आहे. या फिर्यादीवरुन तोफखाना पोलिसांनी आरोपी रामहरी मारुती शिरोळे यांच्याविरुद्ध गुन्हा दाखल केला आहे.