महामार्गावर वाहन चालकांना लूटणारी टोळी जेरबंद

3 दुचाकीसह 1 एअरगन असा 1 लाख 50 हजाराचा मुद्देमाल हस्तगत

स्थानिक गुन्हे शाखेची धडक कारवाई  

नगर, (दि.24) : नगर-मनमाड महामार्गावरुन जाणारी वाहने अडवून चालकास शस्त्राचा धाक दाखवून लूटमार करणारी सराईत गुन्हेगारांची टोळी स्थानिक गुन्हा शाखेच्या पथकाने जेरबंद केली आहे. त्यांच्याकडून 3 दुचाक्यांसह 1 एअरगन असा दीड लाख रुपयांचा मुद्देमाल हस्तगत करण्यात आला आहे.

ताब्यात घेतलेल्यामध्ये अरिफ गफूर शेख (वय 24, पिंपरी अवघड), सागर मांजरे (वय 24,मातापूर), अविनाश साळवे (वय 22, राहुरी), सुखदेव मोरे (वय 23, रा.राहाता), चेतन ससाणे (वय 19, रा.राहाता), अक्षय माळी (वय 22, रा.राहाता), अक्षय कुलथे (वय 20, राहुरी), सागर हरिश्‍चंद्रे (वय 22, धामोरे खूर्द) व अन्य एक अल्पवयीन मुलाचा यामध्ये समावेश आहे.

याबाबत पोलिसांकडून समजलेली माहिती अशी की, वरील सर्व आरोपींना वेगवेगळ्या ठिकाणीवरुन पाठलाग करून ताब्यात घेतले. या आरोपींनी लोणी व कोपरगाव शहर पोलीस ठाणे हद्दीत दाखल गुन्ह्याची कबुली दिली आहे. गुन्ह्यात वापरण्यात आलेली १ लाख २० हजार रु.च्या दोन बिना नंतरच्या पल्सर दुचाकी, ३० रु.ची बिना नंतरची स्पेलडर, २ हजार रु.एअरगन असा १ लाख ५० हजारांचा मुद्देमाल जप्त करण्यात आला आहे.

सर्व आरोपी रात्री राहुरी येथे एकत्र येत होते. यानंतर तीन दुचाकीवरून पिंपळवाडीरोड (ता.राहाता) येथे सुखदेव मोरे यांच्या घरी व शेतात मुक्कामी थांबत होते. रात्री पहाटे ३ वाजल्यानंतर तिन्ही दुचाकीवरून नगर - मनमाड महामार्गावर येऊन एकट्या जाणाऱ्या वाहनचालकाची रेकी करून त्याचा पाठलाग करीत असत. यानंतर दोन्ही दुचाकीवरील सहाजणांनी वाहन अडवून चालकाला चाकू, लोंखडी कत्ती आणि एअर गणचा धाक दाखवून मारहाण करून लुटणे, एक दुचाकीवरील तिघांनी वाहन अडविल्यानंतर समोरुन व पाठीमागून येणाऱ्या वाहनांवर व पोलिसांच्या गाडीवर लक्ष ठेवले जाते होते. लुटमार करणाऱ्या साथीदारांना सावध करणे, गुन्ह्याची माहिती तात्काळ कुणाला सांगू नये, यासाठी चालकांचा मोबाईल काढून तो फोडून फेकून दिला जात असे. गुन्हा करताना रेकी करण्याचे काम आरोपी आलटून पालटून ते करीत असत. या आरोपींमध्ये अविनाश साळवे यांच्यावर राहुरी पोलीस ठाण्यात ६ तर एमआयडीसी पोलीस ठाण्यात १ असे गुन्हे दाखल. सागर मांजरे यांच्यावर तोफखाना पोलीस ठाण्यात १०, एमआयडीसी, राहुरी, श्रीरामपूर पोलीस ठाण्यात गुन्हे दाखल. आरिफ शेखवर राहुरी, एमआयडीसी, सोनई पोलीस ठाण्यात, अक्षय माळी यांच्यावर संगमनेर पोलीस ठाण्यात, अक्षय कुलथे यांच्यावर राहुरी पोलीस ठाण्यात तर सागर हरिश्चंद्र यांच्या वर हडपसर, दिधी (पुणे), नगर तालुका, राहुरी व सोनई पोलीस ठाण्यात गुन्हे दाखल आहेत.

जिल्हा पोलीस अधीक्षक अखिलेश कुमार सिंह, श्रीरामपूर अपर पोलिस अधीक्षक दीपाली काळे - कांबळे, शिर्डी उपविभागीय पोलीस अधिकारी सोमनाथ वाकचौरे यांच्या मार्गदर्शनाखाली एलसीबीचे पो.नि.दिलीप पवार यांनी दिलेल्या सूचनेनुसार सपोनि संदीप पाटील, शिशिरकुमार देशमुख, सफौ. नानेकर, पोहेकाँ मनोज गोसावी, दत्ता गव्हाणे, पोना संदीप कर्डीले, दीपक शिंदे, रवि सोनटक्के, संतोष लोढे, विशाल दळवी, रणजित जाधव, राहुल सोळुंके, मयुर गायकवाड, शिवाजी ढाकणे, प्रकाश वाघ, सागर ससाणे, किरण जाधव, सागर सुलाने, चापोहेकाँ संभाजी कोतकर, सचिन कोळेकर आदीच्या पथकाने ही कारवाई केली.