। अहमदनगर । दि.13 फेबु्रवारी । सावित्रीबाई फुले पुणे विद्यापीठाच्या 73 व्या वर्धापनदिना निमित्त नगरमधील चित्र शिल्पकार प्रमोद कांबळे यांना विद्यापीठातर्फे जीवन साधना पुरस्काराने सन्मानित करण्यात आले.
ज्येष्ठ अभिनेते डॉ. मोहन आगाशे यांच्या हस्ते कांबळे यांनी पुरस्कार स्वीकारला. यावेळी कुलगुरू डॉ. नितीन करमाळकर, प्र-कुलगुरू डॉ. एन. एस. उमराणी, व्यवस्थापन परिषदेचे सदस्य राजेश पांडे उपस्थित होते.
कांबळे यांनी जीवनात अनेक चढउतार अनुभवताना त्यांनी आपली कलेवरील निष्ठा ढळू दिली नाही. भारतरत्न नानाजी देशमुख, डॉ. ए. पी. जे. अब्दुल कलाम, पंडित भीमसेन जोशी, सचिन तेंडुलकर, लता मंगेशकर यांच्या सारख्या अनेक दिग्गजांनी कांबळे यांच्या कलेचा गौरव केला आहे. कलाक्षेत्रात त्यांचे काम देश विदेशात नावाजले जाते.
पर्यावरण संवर्धनासाठी त्यांनी सुरू केलेली मातीचे गणपती बनवा’ ही चळवळ राज्यात तसेच देशात सर्वदूर पसरली आहे. या पुरस्काराबद्दल प्रतिक्रिया देताना कांबळे म्हणाले, कलाकाराने नेहमीच नाविन्याचा ध्यास घेतला पाहिजे व आपली निष्ठा कलेप्रती असली पाहिजे. गुरुजन, वडिलांची हिच शिकवण अंमलात आणत या क्षेत्रात योगदान देत आहे.
Tags:
Ahmednagar