। अहमदनगर । दि.17 फेब्रुवारी । अल्पवयीन मुलीस लग्नाचे आमीष दाखवून पळवून नेल्याप्रकरणी जिल्हा न्यायाधीश प्रवीण चतुर यांनी आरोपी भीमराज नामदेव शिंदे (वय 48, रा. बाभुळखेडा, ह. रा. रामवाडी, शिंगवे नाईक, ता.जि. अहमदनगर) याला भा.द.वि. का. कलम 363 अन्वये दोषी धरून 7 वर्षे सक्तमजुरी व पाचशे रुपये दंड तसेच दंड न भरल्यास एक महिना साधी कैद अशी शिक्षा ठोठावली.
या घटनेची हकिकत अशी कि, दि.11 जुलै 2013 रोजी फिर्यादीचा मुलगा व त्याची पत्नी हे पाहुण्यांच्या लग्नासाठी बाहेरगावी गेले होते. तसेच फिर्यादी यांची मुलगी व जावई हे देखील कामानिमित्त घराबाहेर गेले होते. त्यावेळी फिर्यादी यांच्या दोन्ही नाती (वय वर्ष 13 व 14) घरी होत्या. फिर्यादी यांचा जावई व मुलगा हे घरी आले असता त्यांना मुली घरी दिसल्या नाहीत म्हणून त्यांनी फिर्यादीकडे चौकशी केली. त्यावेळी फिर्यादीने त्या दोघीही त्यांच्याकडे आल्या नसल्याची खात्री झाल्यानंतर त्यांनी त्यांच्या नातेवाईकांकडे चौकशी केली व नंतर एम.आय.डी.सी. पोलिस ठाण्यात मुली हरवल्याबाबत फिर्याद दिली.
त्यानंतर पुन्हा त्यांनी त्यांच्या नातेवाईकांकडे चौकशी केली तेव्हा त्यांना समजले की, रामनगर भागात राहणारा भीमराज नामदेव शिंदे व त्याचा अल्पवयीन मित्र हे देखील घरातून निघून गेलेले आहेत. फिर्यादी यांच्या नातींना वरील दोघांनी काहीतरी ़फूस लावून पळवून नेल्याबाबतची खात्रीशीर माहिती फिर्यादी यांना मिळाली. या माहितीनुसार भीमराज शिंदे व त्याचा अल्पवयीन मित्र यांनी फिर्यादी यांच्या नातींना बळजबरीने पळवून नेवासा तालुक्यातील बाभूळखेडा येथे नेले. फिर्यादी तेथे गेले असता फिर्यादी यांना त्या बाभुळखेडा येथे मिळाल्यानंतर त्यांनी मुलींकडे चौकशी केली असता त्यांनी भीमराज शिंदे व त्याचा अल्पवयीन मित्र यांनी लग्नाचे आमीष दाखवून पळवून आणल्याचे सांगितले.
या घटनेबाबत आरोपींविरूध्द एम. आय.डी.सी. पोलीस ठाण्यात भा.द.वि.का.कलम 363, 366(अ), 34 अन्वये गुन्हा नोंदविण्यात आला. या गुन्हयाचा तपास फौजदार एल. एम. गवंड यांनी केला. तपास पूर्ण झाल्यानंतर आरोपींविरूध्द न्यायालयात दोषारोपपत्र दाखल करण्यात आले. या खटल्याची सुनावणी जिल्हा न्यायाधीश प्रवीण व्ही.चतुर यांच्यासमोर झाली. या खटल्यात सरकारी पक्षाच्यावतीने अतिरिक्त सरकारी वकील मंगेश दिवाणे यांनी काम पाहिले.
या खटल्यामध्ये सरकार पक्षाच्यावतीने एकुण सहा साक्षीदार तपासण्यात आले. फिर्यादी, पंच, पिडीत मुलीची आई, पिडीत मुली व तपासी अधिकारी यांच्या साक्षी महत्वाच्या ठरल्या. न्यायालयासमोर आलेला साक्षी-पुरावा, कागदोपत्री पुरावा तसेच अतिरिक्त सरकारी वकील मंगेश दिवाणे यांचा युक्तिवाद ग्राहय धरून न्यायालयाने आरोपीस दोषी धरुन त्यास 7 वर्षे सक्तमजुरी व 500 रुपये दंड तसेच दंड न भरल्यास 1 साधी कैद अशी शिक्षा ठोठावली. या खटल्यामध्ये अतिरिक्त सरकारी वकील दिवाणे यांना पैरवी अधिकारी म्हणून सहायक फौजदार एकनाथ जाधव यांनी मदत केली.