। अहमदनगर । दि.17 फेब्रुवारी । देहविक्री करणार्या महिलांसाठी आलेले अनुदान शहरातील एका नामांकित स्वयंसेवी संस्थेने अपहार केल्याची तक्रार पोलीस अधीक्षकांकडे करुन त्यांची भेट घेतली असता, पोलीस अधीक्षकांनी या प्रकरणी संबंधित पोलीस स्टेशनच्या अधिकार्याला चौकशी करण्याचे आदेश दिले असल्याची माहिती आरपीआयचे (आठवले गट) माजी शहर जिल्हाध्यक्ष नाना पाटोळे यांनी दिली.
नगर शहरात व जिल्ह्यात एड्सबाधित, वेश्या व्यवसाय करणार्या महिलांसाठी कार्य करणार्या एका संस्थेने कोरोनाच्या टाळेबंदीत केंद्र सरकारकडून आलेल्या अनुदानात केलेल्या भ्रष्टाचाराची चौकशी करण्याची मागणी पाटोळे यांनी केली होती. या संस्थेला केंद्र सरकारकडून कोरोनाच्या टाळेबंदीत प्रत्येक महिलेसाठी 15 हजार रुपये अनुदान वितरित करण्यात आले होते.
या अनुदानाच्या यादीत घरगुती, सर्वसाधारण महिला व लहान मुली- ज्यांचा वेश्या व्यवसायासाठी कुठलाही संबंध नाही, अशा महिलांची नावे समाविष्ट करण्यात आली असल्याचा आरोप तक्रारदार एका महिलेने केला होता. याप्रकरणी आरपीआयने पोलीस अधीक्षकांना निवेदन दिले. यानंतर तक्रारदार महिलेकडे असलेले सर्व पुरावे पोलीस अधीक्षकांना सादर करण्यात आले.
या कागदपत्रांची पाहणी करुन पोलीस अधीक्षकांनी स्थानिक पोलिस स्टेशनच्या प्रमुखांना फोन करून या घटनेची चौकशी करण्याचे आदेश दिले. दरम्यान, संबंधित पुरावे स्थानिक पोलिस ठाण्यात दिले असून त्यांनीही या प्रकरणाची चौकशी करण्याचे आश्वासन दिले असल्याचे पाटोळे यांनी सांगितले. या प्रकरणी पाटोळे, बंटी भिंगारदिवे, अतुल भिंगरे, संदीप आहेर, चंद्रकांत ठोंबरे पाठपुरावा करीत आहे.
Tags:
Ahmednagar