। अहमदनगर । दि.07 जानेवारी । मुख्यमंत्री उद्धव ठाकरे यांच्या मातुःश्री व शिवसेना प्रमुख बाळासाहेब ठाकरे यांच्या पत्नी (स्व.) मीनाताई ठाकरे यांना शहर शिवसेनेतर्फे जयंतीनिमित्त अभिवादन करण्यात आले. महापौर रोहिणी शेंडगे, शहरप्रमुख संभाजी कदम, सभापती पुष्पा बोरुडे, माजी महापौर सुरेखा कदम, महिला जिल्हाध्यक्षा आशा निंबाळकर, शहराध्यक्षा अरुणा गोयल आदींसह अन्य उपस्थित होते.
स्व.मीनाताई ठाकरे यांच्या जयंतीनिमित्त शिवसेनेच्यावतीने शहरप्रमुख कदम यांच्या कार्यालयात त्यांच्या प्रतिमेस पुष्पहार अर्पण करुन अभिवादन करण्यात आले. यावेळी बोलताना महापौर शेंडगे म्हणाल्या, शिवसेना प्रमुख बाळासाहेब ठाकरे यांनी शिवसेनेची स्थापना केल्यानंतर माँसाहेब मीनाताई ठाकरे यांनी शिवसेनेच्या कार्यात मोठे योगदान दिले.
महिलांच्या प्रश्नांबाबत त्या आग्रही असत. शिवसैनिकांची मायेने चौकशी करुन त्यांच्या अडचणी त्या सोडवत. त्यांच्या विचाराने प्रेरित होऊन अनेक महिलांनी शिवसेनेस साथ दिली. शिवसेनेनेही महिलांचा नेहमीच सन्मान करुन विविध पदे महिलांना दिले, त्यांची प्रेरणा या मीनाताई होत्या, असे त्या म्हणाल्या. शहरप्रमुख कदम म्हणाले, शिवसेनेच्या जडणघडणीत स्व.मीनाताई ठाकरे यांचे मोठे योगदान राहिले आहे. महिलांना सन्मान मिळाला पाहिजे, ही त्यांची भूमिका शिवसैनिकांनी कसोशीने पाळत आहे, असे सांगितले.
यावेळी माजी गटनेते संजय शेंडगे, नगरसेवक दत्ता कावरे, सचिन शिंदे, संग्राम शेळके, दिपक खैरे, शाम नळकांडे, प्रशांत गायकवाड, दत्ता जाधव, संग्राम कोतकर, संतोष गेनप्पा, सुरेश तिवारी, अशोक दहिफळे, संजय आव्हाड, गणेश झिंजे उपस्थित होते.