पोलिस हवालदार लाच घेताना रंगेहात जाळ्यात

। अहमदनगर । दि.28 एप्रिल । दारु विक्री व्यवसाय सुरळीत सुरू ठेवणे व त्यावर कारवाई न करण्यासाठी हप्ता म्हणून 15 हजार रु.लाचेची मागणी करून तडजोडी अंती 10 हजार रुपये घेताना तोफखाना पोलीस ठाण्याचे पोलिस हवालदार बार्शिकर काळे याला नगर लाचलुचपत प्रतिबंधक विभागाच्या पथकाने रंगेहाथ पकडले.ही कारवाई नगर मनमाड रोड वरील कॉटेज कॉर्नर येथे मंगळवारी (दि.27 ) केली आहे.

याबाबत समजलेली माहिती अशी की, तक्रारदार यांचा दारु विक्री व्यवसाय असुन हा व्यवसाय सुरळीत सुरू ठेवणे व त्यावर कारवाई न करण्यासाठी हप्ता म्हणून पंधरा हजार रुपये लाचेची मागणी पोलीस हवालदार काळे यांनी तक्रारदार यांचेकडे केली. 

तक्रारदार यांनी लाचलुचपत प्रतिबंधक विभागाकडे दिलेल्या तक्रारी वरुन सोमवारी (दि.26 ) रोजी केलेल्या लाचेच्या मागणी पडताळणीत यातील आरोपी पोलीस हवालदार काळे यांनी तक्रारदार यांचेकडे पंधरा हजार रुपये लाचेची मागणी पंचासमक्ष केली. 

तक्रारदार यांनी रक्कम कमी करण्यासाठी विनंती केली असता, तडजोड अंती दहा हजार रुपये देण्याचे ठरले.त्यावरून लाच लुचपत विभागाच्या पथकाने मंगळवारी (दि.27)  सापळा रचला. या आयोजित लाचेच्या सापळा कारवाई दरम्यान दहा हजार रुपये लाचेची रक्कम पंचा समक्ष कॉटेज कॉर्नर, नगर मनमाड हायवे येथे स्विकारली असता, पोलीस . हवालदार.काळे यांना रंगेहाथ पकडण्यात आले.


नाशिक परिक्षेत्र लाचलुचपत प्रतिबंधक विभागाचे पोलिस अधीक्षक सुनील कडासने, अपर पोलिस अधीक्षक निलेश सोनवणे, वाचक पोलीस उपअधीक्षक विजय जाधव याच्या मार्गदर्शनाखाली अहमदनगर पोलिस उपअधीक्षक हरिष खेडकर यांच्या सूचनेनुसार पोलिस निरीक्षक शाम पवरे, पोलीस कर्मचार्‍यांच्या पथकाने ही कारवाई केली आहे.