। अहिल्यानगर । दि.06 डिसेंबर 2025 ।आज पहाटे पावणेचारच्या सुमारास भरधाव वेगात चाललेल्या एका टॅव्हल्स बसने अचानक पेट घेतला. या घटनेत सुदैवाने सर्व प्रवासी सुरक्षीत राहिले आहेत. परंतु बस पूर्णपणे जळून खाक झाली. अरणगाव- वाळुंज बायपास रस्त्यावर बाबुर्डी घुमट (ता. नगर) शिवारात ही घटना घडली. आगीची घटना कशामुळे घडली, याबाबत अजून स्पष्ट झाले नसून बस कोणत्या ट्रॅव्हल्स कंपनीची आहे, याचा शोध नगर तालुका पोलिसांकडून घेतला जात आहे.
पुणे- बीड (एमएच 09 सीव्ही 6309) ही ट्रॅव्हल्स बस पुण्याहून बीडच्या दिशेने चालली होती. या बसमध्ये एकूण 27 प्रवासी होते. अरणगाव- वाळुंज बायपास रस्त्यावरून ही बस चालली होती. अरणगाव जवळील बाबुर्डी घुमट शिवारात पहाटे पावणेचारच्या दरम्यान बस भरधाव वेगात चालली असताना बसने अचानक पेट घेतला.
बसने पेट घेतल्याचे लक्षात येताच चालक आणि बसमधील प्रवासी पटकन बसमधून उतरले. प्रवासी बसमधून उतरताच बसच्या आगीने भडका घेतला. त्यामुळे बस पूर्णपणे जळून खाक झाली. या घटनेची माहिती नगर तालुका पोलिसांना मिळताच पोलिस कर्मचारी तातडीने घटनास्थळी दाखल झाले. अग्निशामक दलालाही पाचरण करण्यात आले. पोलिस आणि अग्निशमन दलाने बचाव कार्य करीत बसला लागलेली आग विझवण्यात आली.