। अहिल्यानगर । दि.26 नोव्हेंबर 2025 । गुगल मॅपवर महावितरणचे वीज उपकेंद्र शोधायचे आणि त्या लोकेशनचे आधारे वीज उपकेंद्रातून कॉपर चोरी करायची. अशी आधुनिक पद्धत अवलंबत चोर्या करणारी आंतरराज्यीय टोळी नगर च्या स्थानिक गुन्हे शाखेने पकडली आहे. या टोळीकडून नगर, नाशिक व पुणे या 3 जिल्ह्यातील कॉपर चोरीचे 6 गुन्हे उघडकीस आले आहेत. तर आरोपींकडून 4 लाख 40 हजार रुपये किंमतीचा मुद्देमाल जप्त करण्यात आला आहे.
याबाबतची हकीगत अशी की, नगर तालुक्यातील महावितरणचे 132 के. व्ही. उपकेंद्र खांडके येथील कॉपर चे पाईप, बेल्ड कोणीतरी अज्ञात चोरट्यांनी 4 नोव्हेंबर रोजी चोरून नेले होते.याबाबत नगर तालुका पोलीस ठाण्यात गुन्हा दाखल करण्यात आलेला आहे. नगर जिल्ह्यामध्ये कॉपर चोरीच्या वारंवार घटना होत असल्याने पोलीस अधीक्षक सोनाथ घार्गे यांनी स्थानिक गुन्हे शाखेस कॉपर चोरी करणारे आरोपींची माहिती काढुन गुन्हे उघडकीस आणणेबाबत सुचना दिल्या होत्या.
त्यानुसार स्थानिक गुन्हे शाखेचे पो.नि. किरणकुमार कबाडी यांचे मार्गदर्शनाखाली पोलीस उपनिरीक्षक समीर अभंग, पोलीस अंलदार राहुल द्वारके, लक्ष्मण खोकले, विष्णु भागवत, फुरकान शेख, भिमराज खर्से, राहुल डोके, अमोल आजबे, जालिंदर माने, योगेश कर्डीले, प्रशांत राठोड, प्रमोद जाधव, महादेव भांड यांचे पथक तयार करण्यात आले होते.
सदर पथकाने अहिल्यानगर जिल्ह्यातील कॉपर चोरीचे घटनांठिकाणी भेट देवुन माहिती संकलित केली तसेच अशाप्रकारे गुन्हे करणारे रेकॉर्डवरील आरोपींची माहिती घेण्यात आली. कॉपर चोरीच्या घटनाठिकाणचे प्राप्त माहितीवरुन व्यवसायिक कौशल्याचे आधारे सलग 8 दिवस तपास करुन 24 नोव्हेंबर रोजी मिळालेल्या माहितीनुसार आरोपी बबलु उर्फ हुसेन रेहमत खान (वय 38, रा. कडमेडी, ता. समशाबाद, जि. विदीशा, मध्यप्रदेश), समीम कमरअली खान (वय 32, रा. कडमेडी, ता. समशाबाद, जि. विदीशा, मध्यप्रदेश), शकील लईस खान (वय 32, रा. ग्रामभरोसा, ता. बेरसिया, जि. भोपाळ, मध्यप्रदेश), कासीम इदरीस खान (वय 30, रा. महाराज खेडी, ता. सिरोज, जि. विदीशा, मध्यप्रदेश), शाहरुख साबीर खान (वय 23, रा. जिनीया, जि. भोपाळ, मध्यप्रदेश) यांना ताब्यात घेतले.
त्यांचेकडे सखोल व बारकाईने तपास करता त्यांनी गुगल मॅपवर महावितरणचे उपकेंद्र कोठे आहे याबाबत माहिती घेवुन त्यानंतर सदर उपकेंद्र परिसरामध्ये दोन दिवस पाहणी करुन येण्या जाण्याचे रस्त्याची माहिती घेवुन रात्री व पहाटेच्या दरम्यान चोरी करत असल्याचे सांगितले आहे.
तसेच सदर चोरीचा मुद्देमाल घेवुन फरार होत व फक्त कॉपर चोरीच्या उद्देशाने तेमहाराष्ट्रामध्ये येत असल्याचे निष्पन्न झाले आहे. ताब्यातील आरोपींनी खांडके (ता. नगर) येथील उपकेंद्र, 220 केव्ही कौडगांव (ता. नगर) येथील विंड वर्ल्ड लि. कंपनीचे उपकेंद्र, शेवगांव, नेवासा, सिन्नर, पारगांव या ठिकाणी असलेले महावितरणच्या उपकेंद्रातून गुगल मॅपचे लोकेशनचे आधारे कॉपर चांरी केल्याचे सांगितले. मिळून आलेल्या इसमांचे ताब्यातुन 1 लाख 40 हजार रुपये किमतीचे कॉपर पोल व 3 लाख रुपये किमतीची गुन्ह्यामध्ये वापरलेली मारुती सुझुकी कंपनीची स्विफ्ट डिझायर कार (क्र. एम.एच. 13 टी. ए. 4320) असा एकुण 4 लाख 40 हजार रुपये किंमतीचा मद्देमाल जप्त करण्यात आला आहे.