चौथ्या शिवाजी महाराजांच्या नावे असेल शाळा
युवराज शहाजीराजे यांचा विश्वास
दिल्लीगेट-पत्रकार चौक रस्त्याचे नामकरण
। अहमदनगर । दि.15 सप्टेंबर । भारताच्या स्वातंत्र्यासाठी प्राणार्पण केलेल्या छत्रपती चौथ्या शिवाजी महाराजांचा मागे पडलेला इतिहास पुढे आणण्यासाठी अहमदनगर शहरातील मुख्य रस्त्याला चौथे शिवाजी महाराजांचे नाव द्यावे, यासाठी ‘स्मायलिंग अस्मिता कष्टकरी शेतकरी विद्यार्थी संघटना ’ आणि छत्रपती चौथे शिवाजी महाराज स्मारक समितीने प्रयत्न केला. लवकरच जिल्ह्यात त्यांच्या नावे एक शाळा व महाविद्यालय असेल, असा विश्वास युवराज शहाजीराजे छत्रपती यांनी व्यक्त केला.
दिल्लीगेट ते पत्रकार चौक रस्त्याला चौथे शिवाजी महाराज असे नाव देण्यात आले. त्या वेळी ते बोलत होते. या वेळी शहाजीराजे यांनी स्मारकातील चालू असलेल्या विकासकामांची पाहणी केली. स्मारकाच्या कामाला गती देण्यासाठी कटिबद्ध असल्याची ग्वाही त्यांनी दिली.
आमदार संग्राम जगताप यांनी, ‘लवकरच मोठा निधी पुढील विकास कामासाठी सरकारकडून मिळवून देऊ आणि मोठ्या प्रमाणावर काम उभे करू, ’असा विश्वास व्यक्त केला. महापालिकेच्या स्थायी समितीचे सभापती गणेश कवडे यांनी या ऐतिहासिक कामाची संधी मिळाली याचा अभिमान आहे असे म्हटले.
‘स्मायलिंग अस्मिता’चे कार्याध्यक्ष यशवंत तोडमल यांनी प्रास्ताविकात भविष्यातील कामांची माहिती दिली. सर्वांनी सहकार्य केले, तर भारतातील पहिले आदर्श स्मारक अहमदनगरला होईल, असे ते म्हणाले. या वेळी माजी महापौर शीला शिंदे, नगरसेवक विनीत पाउलबुधे, डॉ सागर बोरूडे, निखील वारे, ‘जिजाऊ ब्रिगेड’च्या संपूर्णा सावंत, पद्मा गांगर्डे, अनुराधा येवले आदी मान्यवर उपस्थित होते. सूत्रसंचालन सूर्यकांत वरकड यांनी केले. नगरसेवक बाळासाहेब पवार यांनी आभार मानले. रिनुल नागवडे, सिद्धीता दरेकर, पूजा गांगर्डे, विनीत गाडे, धीरज कुमटकर, सचिन सापते, प्रवीण गांगर्डे यांनी कार्यक्रमाच्या यशस्वीततेसाठी परिश्रम घेतले.