। सांगली । दि.19 फेब्रुवारी । जम्मू- काश्मीरमध्ये अतिरेक्यांशी झालेल्या चकमकीत सांगली जिल्ह्यातील वाळवा तालुक्यातील शिगाव गावचे 23 वर्षीय रोमीत तानाजी चव्हाण शहीद झाले आहेत.
जम्मू- काश्मिरमधील शोपियांमध्ये झालेल्या चकमकीत दोन सुरक्षा जवान शहीद झाले. या शहीद जवानांमध्ये रोमित यांचा समावेश आहे. या चकमकीत एका दहशतवाद्याला ठार करण्यात सुरक्षा दलाला यश आले आहे.
शोपियां जिल्ह्यातील जैनापुरातील चेरमार्ग भागात आज दुपारी ही चकमक झाल्याची माहिती मिळत आहे. सांगली जिल्हयातील बागणी शिगाव (ता. वाळवा) गावचे सुपुत्र रोमित तानाजी चव्हाण (वय 23) यांना जम्मू काश्मीर येथे देशसेवा बजावत असताना वीरमरण आले.
जम्मू-काश्मीर येथील शोपिया या भागामध्ये दहशतवाद्यांच्यावरील कारवाईच्या वेळेस गोळीबार झाला. त्यामध्ये शिगाव गावचे सुपुत्र 1 राष्ट्रीय रायफलचे जवान रोमित तानाजी चव्हाण हे दहशतवाद्यांशी लढताना शहीद झाले. पाच वर्षा पूर्वी रोमित हा मुंबई येथे सैन्य दलात भरती झाला होता.
रोमितचे वडील तानाजी चव्हाण हे राजारामबापू पाटील साखर कारखाना येथे कार्यरत आहेत. आई गृहिणी आहे. तर बहिण शिक्षण घेत आहे. शिगाव गावासह आजूबाजाच्या भागात ही बातमी समजताच सर्व व्यवहार बंद ठेवण्यात आले आहेत. गावावर शोककळा पसरली आहे. पार्थिव रविवारी संध्याकाळपर्यंत गावात येण्याचा प्रशासनाचा अंदाज आहे.