। अहमदनगर । दि.25 नोव्हेंबर । तुळशीच्या झाडावर थूंकू नकोस, असे म्हणाल्याचा राग आल्याने एकनाथ हापसे यांना शिवीगाळ करुन काठीने मारहाण करण्यात आली. ही घटना राहुरी तालुक्यातील उंबरे येथे दिनांक 21 नोव्हेंबर रोजी घडली असून याबाबत विकास जगताप याच्यावर गुन्हा दाखल करण्यात आला.
दिनांक 21 नोव्हेंबर रोजी सकाळी अकरा वाजेच्या दरम्यान एकनाथ रंगनाथ हापसे हे राहुरी तालुक्यातील उंबरे येथे त्यांच्या घरासमोर हरिपाठ पुस्तक वाचत बसले होते. तेव्हा त्या ठिकाणी आरोपी विकास लक्ष्मण जगताप हा त्याच्या मोटरसायकलवर बसून आला. तेव्हा तो एकनाथ हापसे यांच्या घरासमोर असलेल्या तुळशीच्या झाडाजवळ थुंकत होता.
त्यावेळी एकनाथ हापसे त्याला म्हणाले कि, तुळशीचे झाड आहे. तेथे थुंकू नकोस. या कारणावरुन आरोपी विकास जगताप याने एकनाथ हापसे यांना वाईट वाईट शिवीगाळ केली तसेच त्यांना काठीने मारहाण करून जखमी केले आणि तू जर परत माझ्या नादी लागला तर तुला जीवे मारुन टाकीन, अशी धमकी दिली.
या प्रकरणी एकनाथ रंगनाथ हापसे यांनी राहुरी पोलिसात दिलेल्या फिर्यादीवरून विकास लक्ष्मण जगताप याच्या विरोधात मारहाणीचा गुन्हा दाखल करण्यात आला. या घटनेचा पुढील तपास पोलिस निरीक्षक राजेंद्र इंगळे यांच्या मार्गदर्शनाखाली सहाय्यक फौजदार सी. एन. बर्हाटे हे करीत आहेत.