। अहमदनगर । दि.24 एप्रिल । शेळी चोरताना शेतकऱ्यावर गोळ्या झाडून जीवे मारण्याचा प्रयत्न करण्याऱ्या सराईत गुन्हेगाराला पोलिसांनी अटक केली. १० एप्रिलला पहाटे बापू गणपत गरड (निंबोडी, ता. कर्जत) यांना आपल्या शेळीची चोरी होत असल्याचे लक्षात आल्याने त्यांनी आरडाओरडा केला.
त्यांचा भाऊ खंडू व भाचा किसन चोराला पकडण्यासाठी पळाले. शेळी घेऊन बापू गणपत गरड मोटारसायकलीवर पळून जात होता. त्याने गावठी कट्ट्यातून गोळी झाडून खंडू किसन गरड, भरत दिनकर बर्डे यांना ठार मारण्याचा प्रयत्न केला.
पोलिस निरीक्षक चंद्रशेखर यादव यांनी नगर, उस्मानाबाद, सोलापूर व बीड जिल्ह्यातील रेकॉर्डवरील १०० पेक्षा जास्त आरोपींची माहिती घेतली. यादव, सहायक निरीक्षक सुरेश माने, अमरजित मोरे व पथकाने केलेल्या तपासात हा गुन्हा अमर दत्तू पवार (अरणगाव, ता. जामखेड) व करण पंच्याहत्तर काळे (पाथरुड, जि. उस्मानाबाद) यांनी केल्याचे निष्पन्न झाले.
आरोपी पोलिस पथकाला हुलकावणी देत होते. २१ एप्रिलला आरोपी पाथरुड, वडगाव नळी परिसरात फिरत असल्याचे समजल्याने पोलिसांनी दोन दिवस या परिसरात थांबून २२ एप्रिलला रात्री अमर दत्तू पवार (२६) यास ताब्यात घेतले. दुसरा आरोपी करण काळे मात्र पळून गेला.