विजेचा शॉक बसलेल्या त्या कर्मचार्याचा अखेर मृत्यू
। अहमदनगर । दि.27 फेब्रुवारी । श्रीरामपुर येथील पारेगाव ब्रुदुक येथे विजेच्या खांबावर काम करीत असताना देवकोठे येथील कंत्राटी वीज कामगार निवृत्ती शंकर मुंबसे (वय 32) यांचा अचानक आलेल्या विजेचा जबर धक्का बसून ते खांबावरुन खाली कोसळत गंभीर जखमी झाले होते.
दरम्यान, घटना घडल्यापासून नाशिक येथील खासगी रुग्णालयात उपचार सुरू असताना काल त्यांचा दुर्देवी मृत्यू झाला. महावितरण कंपनीत कंत्राटी वीज कामगार म्हणून कार्यरत असलेले निवृत्ती मुंगसे दि. 18 फेब्रुवारी रोजी सायंकाळी सहाच्या सुमारास अधिकृतपणे भारनियमन घेऊन ते पारेगाव बुद्रुक शिवारात विजेच्या खांबावर चढून काम करीत होते.
दरम्यान, अचानक विद्युत प्रवाह सुरु झाल्याने त्यांना जबर शॉक लागला व ते खांबावरून खाली कोसळले. तेव्हापासून ते बेशुध्द अवस्थेत होते.त्यांना प्रथम संगमनेर येथील तांबे हॉस्पिटलमध्ये व तेथून तातडीने नाशिक येथील सोपान हॉस्पिटलमध्ये उपचारासाठी दाखल करण्यात आले.
त्यानंतर सोपान हॉस्पिटलमधून त्यांना अशोक हॉस्पिटलमध्ये उपचारासाठी हलविण्यात आले होते. सहा दिवसांपासून निवृत्ती मुंगसे हे बेशुध्द होते. दरम्यान, सकाळी 9 वाजेच्या सुमारस निवृत्ती मुंगेसे यांचा उपचारादरम्यान मृत्यू झाला.