माजी उपसभापती डॉ. दिलीप पवार यांची मागणी
इसळक, निंबळक, खारेकर्जुने नेप्ती महसूल मंडळाला जोडावेत
| अहिल्यानगर | दि.22 एप्रिल २०२५ | निंबळक, इसळक, खारे कर्जुने ही गावे नेप्ती महसूल मंडळाला जोडावेत, या मागणीचे निवेदन नगर- पारनेर मतदारसंघाचे आमदार काशिनाथ दाते यांना देण्यात आले. नगर पंचायत समितीचे माजी उपसभापती डॉ. दिलीप पवार यांच्या नेतृत्वाखाली हे निवेदन देण्यात आले.
सदर गावे सध्या नागापूर महसूल मंडळात समाविष्ट आहेत. या भागातील पर्जन्यमापक नागापूर सीना परिसरात आहे. त्यामुळे तेथे पर्जन्यमान जास्त दर्शविले जाते. परंतु वास्तविकपणे ही गावे कमी पावसाची आहेत. याचा फटका शेतकरी वर्गाला विविध शासकीय योजना घेताना बसतो. चुकीची आणेवारी आल्याने शेतकरी वंचित राहतो.
तसेच या मंडळात येणारी इतर गावे विळद,देहरे,नांदगाव शिंगवे,शिंगवे नाईक हे बाग़ायत क्षेत्राची आहेत. ते या शहरी मंडळात येतात. निंबळक, इसळक,खारे कर्जुने, ही गावे जिरायत क्षेत्राची असून खारे कर्जुने या गावाचे भारत सरकारचे संरक्षण खात्याकड़े मोठ्या प्रमाणात क्षेत्र असून सदर क्षेत्र हे पड़ व नापिक आहे. या तिनही गावातील शेतकरी वर्गाला पीक विमा, खराब हवामान, इतर नैसर्गिक आपत्तीमध्ये मिळणार्या सुविधा, शेती कर्जाचे पुनर्गठन, कृषि विभागाच्या सुविधा आदिपासून वंचित राहावे लागत आहे.
त्यामुळे त्यांच्यावर मोठ्या प्रमाणात वर्षानुवर्ष अन्याय होत आहे. या शेतकर्यांना न्याय मिळावा, यासाठी नव्याने झालेल्या नेप्ती मंडलात समावेश करावा, तसेच या परिसरात नविन पर्जन्यमापक बसवावा, अशा आशयाचे निवेदन देण्यात आले. याप्रसंगी अंबादास शेळके, विलास कांडेकर, राहुल दरंदले, राम शेळके तसेच परिसरातील शेतकरी उपस्थित होते.
मागील वर्षापासून या संदर्भात पाठपुरावा करत आहे. परंतु शासन दरबारी अनास्था आहे. तत्कालीन जिल्हाधिकारी सालिमठ यांनी शेतकर्यांच्या जिव्हाळ्याचा प्रश्न गंभीरतेने घेतला नाही.
- डॉ.दिलीप पवार ( माजी उपसभापती,पंचायत समिती)
शेतकर्यांच्या या प्रश्नासंदर्भात जिल्हाधिकारी यांच्याशी चर्चा करू. शेतकर्यांना न्याय मिळण्यासाठी महसूल मंडळात बदल करण्यासाठी प्रयत्न करू.
-आ. काशिनाथ दाते