मंगळवारी (दि.12 ऑक्टोबर) महापालिका पेन्शनर असोसिएशनच्या पदाधिकार्यांच्या शिष्टमंडळासह झालेल्या बैठकीत महापालिका निवृत्त कर्मचार्यांना महागाई फरक देण्याचे आश्वासन महापालिका आयुक्त शंकर गोरे यांनी दिले असल्याची माहिती असोसिएशनचे अध्यक्ष एन.एम.पवळे यांनी दिली. यामुळे दिवाळीपूर्वी महापालिका पेन्शनरांना महागाई फरकाची रक्कम मिळणार आहे. व त्यातून दिवाळी साजरी करण्याचा आनंद निवृत्तांना मिळणार आहे.
दिवाळीपूर्वी महापालिका पेन्शनर कर्मचार्यांना महागाई फरक व सहाव्या वेतन आयोगाची प्रलंबित बिले मिळण्यासंदर्भात आयुक्त गोरे व मुख्य लेखा अधिकारी प्रवीण मानकर यांच्यासह पेन्शनर असोसिएशनच्या पदाधिकार्यांच्या शिष्टमंडळाची बैठक झाली.
यामध्ये पेन्शनर कर्मचार्यांना दिवाळी साजरी करता यावी यासाठी सन 2017 ते 2018 मध्ये महागाई भत्त्याचा प्रलंबित असलेला 56 लाख रुपयांचा फरक देण्याची मागणी करण्यात आली. आयुक्त व अर्थ विभागाचे मुख्य लेखाधिकारी यांच्याशी चर्चा होऊन दिवाळीपूर्वी 56 लाख रुपये महागाई भत्ता फरक देण्याचे आश्वासन देण्यात आले.
त्याचप्रमाणे सहाव्या वेतन आयोगाची प्रलंबित देयके अदा करण्याकरिता बिले तयार झालेली नसल्यने ती तात्काळ तयार करण्याचे आश्वासन या बैठकीत देण्यात आले. ही रक्कम सुमारे चार कोटीपर्यंत असून त्याची थकबाकी किती आहे, हे बिले तयार झाल्यानंतर समजणार आहे. बैठकीत सकारात्मक निर्णय घेऊन आयुक्तांनी पेन्शनरांनी मांडलेले सर्व प्रश्न सोडविण्याबाबत सूचना प्रशासनास केल्या आहेत.
या बैठकीस संघटनेचे अध्यक्ष पवळे यांच्यासह डी.यू. देशमुख, एल.के. जगताप, वसंत थोरात, इम्तियाज शेख, मंजूर शेख, रंगनाथ गावडे, मोहन खपके, एन.एस. वाघ, बी.एच. भोर, मधुकर खताळ, रमेश खोलम, बोरगे, ज्ञानेश्वर धिरडे, टेपाळे, इक्बाल शेख, मंजूर अहमद शेख आदी उपस्थित होते.