मुंबई, (दि.25 ऑक्टोबर) : राष्ट्रवादी काँग्रेसचे राष्ट्रीय अध्यक्ष शरद पवार यांच्याहस्ते नुकतेच खासदार डॉ.अमोल कोल्हे यांनी लिहिलेल्या व डिंपल प्रकाशनाने प्रसिद्ध केलेल्या ‘शिवगंध’ या पुस्तकाचे प्रकाशन पवारांचे निवासस्थान ‘सिल्व्हर ओक’ येथे करण्यात आले आहे.
कार्यक्रमप्रसंगी शरद पवार यांनी अमोल कोल्हे यांचे कौतुक केले. ते म्हणाले, नारायणगावमधून येऊन एक दर्जेदार डॉक्टर, तितकाच उत्तम अभिनेता आणि आपल्या खासदारकीच्या पहिल्याच टर्ममध्ये पहिल्याच वर्षी ‘संसदरत्न’ पुरस्कार मिळवणारा संसदपटू असणार्या अमोल कोल्हे यांची वाटचाल मी जवळून पाहतो आहे.
माझे स्नेही डॉ.रवी बापट हे मला सुरुवातीपासून अमोल कोल्हे यांच्याबद्दल सांगत असत.‘राजा शिवछत्रपती’ या गाजलेल्या मालिकेत छत्रपती शिवाजी महाराजांची भूमिका करत असताना आलेल्या अनुभवांविषयी, त्यासाठी घेतलेल्या मेहनतीविषयी त्यांनी ‘शिवगंध’ या पुस्तकात रंजकतेने लिहिले आहे.
डॉ. नीतिन आरेकर यांनी त्यांचे अनुभव तशाच रंजकतेने शब्दांकित केले आहेत. महाराष्ट्रातल्या प्रत्येकाने हे पुस्तक वाचलं पाहिजे. यावेळी खासदार सुप्रिया सुळे, लेखक आणि खासदार डॉ. अमोल कोल्हे, पुस्तकाचे शब्दांकनकार डॉ. नीतिन आरेकर, डिंपल प्रकाशनाचे अशोक मुळ्ये, कौतुक मुळ्ये, हॉटेल प्रीतमचे संचालक अमरदीपसिंग कोहली आदी उपस्थित होते.