। कोल्हापूर । दि.21 जानेवारी । कोल्हापूर जिल्हा मध्यवर्ती सहकारी बँकेच्या अध्यक्ष व उपाध्यक्षपदाची निवडणूक गुरुवारी झाली. संख्याबळानुसार अध्यक्षपदाची निवड करण्यात आली आहे. ग्रामविकासमंत्री हसन मुश्रीफ यांची अध्यक्षपदी पुन्हा एकदा निवड झाली आहे, तर काँग्रेसचे आमदार राजू आवळे यांची उपाध्यक्षपदी निवड झाली.
आघाडीची सकाळी बैठक झाली. यामध्ये हसन मुश्रीफ आणि राजूबाबा आवळे यांची नावे निश्चित झाली. जनसुराज्य शक्ती पक्षाचे अध्यक्ष विनय कोरे हे आघाडीअंतर्गत पाडापाडीबद्दल आपली स्पष्ट भूमिका सर्व नेत्यांसमोर मांडतील, अशी शक्यता वर्तवली जात होती.
त्यामुळे आघाडीच्या बैठकीत वातावरण तापले होते. जिल्हा बँकेच्या निवडणुकीत सत्ताधारी आघाडीला १८, तर विरोधी आघाडीला ३ जागा मिळाल्या आहेत. संचालक मंडळात नको असलेले कोरे यांचे विरोधी बाबासाहेब पाटील-आसुर्लेकर निवडून आल्याने विनय कोरे नाराज असल्याचे बोलले जात आहे.